“ İNSANLARA HÜRRİYYƏT, MİLLƏTLƏRƏ İSTİQLAL ”

MİLLİ KONQRES PARTİYASININ

PROQRAMI

            Milli Konqres Partiyası hesab edir ki, Azərbaycan türklərinin və minilliklər boyu onlarla birlikdə bu torpaqda yaşayan xalqların dünyanın başqa xalqları kimi azad, firavan, təhlükəsiz və xoşbəxt yaşamaq haqları var. Azərbaycanlılar bu haqlarını həyata keçirmək üçün dünya birliyinin tanıdığı qaydalar çərçivəsində yaşamalı və mübarizə aparmalıdırlar. Milli Konqres Partiyası millətimizi gələcəyə bu yolla aparacağını bildirir.

           Milli Konqres Partiyası hesab edir ki, ümummilli problemlərin həll edilməsi üçün milli gücümüz başlıca hədəflərə yönəldilməlidir. Partiya bu məqsədlə milli dəyərlərə, müsavatçılıq düşüncəsinə əsaslanan siyasi ideologiyaya arxalanaraq “İnsanlara hürriyyət, millətlərə istiqlal” və “Bir millət – bir dövlət”şüarlarında ortaya qoyulan siyasi – fəlsəfi dəyərlərə əsaslanacaq.

          Milli Konqres Partiyası “Bir millət – bir dövlət” şüarları ilə Güney Azərbaycanın istiqlalı, itirilən Azərbaycan torpaqlarının – Qarabağın, Qərbi Azərbaycanın, Dərbəndin qaytarılması ilə Azərbaycanın bütövləşməsi ideyasını mədəni bir düşüncədən siyasi məfkurəyə çevirməyi zəruri hesab edir, Azərbaycanın siyasi, iqtisadi və mədəni bütövlüyünün millətimizin inkişaf və təhlükəsizliyinin başlıca qarantı olduğunu bəyan edir.

         Milli Konqres Partiyasının ideologiyası milli düşüncəni təşkil edən ideyalardır. Həmin ideyalar bunlardır :

1.     İstiqlalçılıq.  Azərbaycan xalqı Birləşmiş Millətlər Təşkilatının “Vətəndaş və siyasi haqlar haqqında Beynəlxalq pakt”ında müəyyən edilən millətlərin öz müqəddəratını təyinetmə hüququ əsasında öz müstəqil dövlətini qurmaq haqqına malikdir. Azərbaycan Respublikası tarixi Azərbaycan torpaqlarının bir hissəsində qurulan, ancaq bütün azərbaycanlıların dövlətidir.

2.     Cümhuriyyətçilik.  Azərbaycan dövləti öz formasına görə Cümhuriyyətdir (Respublikadır). Prezidentli Respublika Azərbaycan dövlətini daha qüvvətli, azad və demokratik, özünü yaşadabilmə imkanı verə bilən bir dövlət forması kimi təşəkkül tapmalıdır.

3.     Demokratiya.  Azərbaycan Respublikası demokratik bir dövlətdir. Dövlət hakimiyyətinin mənbəyi Azərbaycan xalqıdır.

4.     Azadlıq.  Azərbaycan Respublikasında insanlar azad yaşamalıdırlar. Birləşmiş Millətlər Təşkilatının “İnsan haqları bəyannaməsin”də, “Vətəndaş və siyasi haqlar haqqında” Beynəlxalq Paktında, digər beynəlxalq sənədlərdə və Azərbaycan Respublikasının Konstitusiyasında nəzərdə tutulan insan haqları və azadlıqlarının qorunması təmin edilməlidir.

5.     Sosial ədalət.  Azərbaycan Respublikası sosial dövlət olmalı, mükəmməl azad bazar iqtisadiyyatından faydalanaraq  sosial bazar iqtisadiyyatını əsas hədəf kimi götürməlidir. Xüsusi mülkiyyətin inkişafı və müdafiəsi ilə yanaşı az gəlirli vətəndaşların sosial təminatı dövlətin başlıca vəzifələrindən biri olmalıdır.

6.     Türkçülük.  Azərbaycan Respublikası türklərin digər qardaş xalqlarla bir Vətəndə yaşadığı bir dövlətdir. Azərbaycan Respublikası türklüyə mənsub bir ölkə olduğu üçün digər türk ölkələri ilə milli-mədəni bağlılığa malikdir. Bu bağlılıq Azərbaycan dövlətinin və xalqının təhlükəsizliyinin təmin edilməsinə, iqtisadi inkişafa və mədəni yüksəlişə əlavə imkanlar yaradır.

7.     Millətçilik.  Bu ideyanın əsası olan vətənpərvərlik milli istiqlalın əldə edilməsi, dövlət qurulması, Vətənin müdafiə edilməsi və təhlükəsizliyinin qorunması, ölkənin inkişaf etdirilməsi üçün milləti birləşdirən və səfərbər edən düşüncədir.

8.     Azərbaycançılıq.  Bu ideya Azərbaycan xalqının müstəqilliyə, unitarlığa və bütövlüyə söykənən vətənsevərliyidir.

9.     İslamçılıq.  Azərbaycan xalqının əxlaq və mənəviyyatının formalaşmasında önəmli yeri olan islam dini Azərbaycan milli və mədəni düşüncəsinin ayrılmaz hissəsidir, millətin bütövlüyünü və birliyini mühafizə edən amillərdən biridir. İslam dini Azərbaycanı islam dünyası ilə bağlayan körpüdür. İslam digər dinlərə humanist yanaşma və dözümlülük təlqin edən din kimi müxtəlif dinlərə etiqad edən insanların birgə yaşayışını və əməkdaşlıq etmələrini təbliğ edir.

10. Dünyəvilik.  Azərbaycan Respublikası dünyəvi dövlətdir. Din və dövlət bir-birinin işinə qarışmamalıdır. Dövlət vicdan azadlığına və azad dini fəaliyyətə təminat verməlidir.

 Bu düşüncələrin daşıyıcısı olan Milli Konqres Partiyasının qarşısına qoyduğu hədəflər aşağıdakılardır :

1.     Azərbaycanın demokratik dövlət quruculuğu və inkişafı, vətəndaşların haqq və azadlıqlarının qorunması. Azad və demokratik seçkinin keçirilməsinin hakimiyyətə gəlməyin yeganə yol olduğu düşüncəsinin formalaşdırılması, seçmə və seçilmə haqqı ilə demokratik seçki ənənələrinin yaradılması, ölkənin idarə edilməsi işində hüququn üstünlüyü prinsiplərinin təmin edilməsi.

2.     Ölkənin məqsədyönlü iqtisadi inkişafının milli iqtisadi inkişaf proqramı əsasında aparılması, ölkənin elm, təhsil, kadr, maliyyə potensialının bu istiqamətə yönəldilməsi. Qısa, orta və uzunmüddətli inkişaf proqramlarını qəbul edib ölkənin iqtisadi yüksəlişini təmin etmək və dünya ilə inteqrasiyasına nail olmaq. İlk on ildə milli gəlirin adambaşına düşən payının beş min ABŞ dollarına çatdırılması.

3.     Azərbaycanın iş adamlarının xüsusi təşəbbüsünün ölkənin iqtisadi inkişafına cəlb edilməsi və onlara dövlət güzəştinin edilməsi.

4.     Milli sərvətlərdən səmərəli istifadənin təşkil edilməsi, israfçılığa yol verilməməsi.

5.     Xəzər neft siyasətinin və Böyük İpək yolu siyasətinin Azərbaycanın iqtisadi, sosial və siyasi inkişafında aparıcı əhəmiyyətini, bu siyasətin Azərbaycanın dünya qarşısındakı tarixi missiyalarından biri olduğunu nəzərə alaraq onun həyata keçirilməsinin dönməzliyinin təmin edilməsi.

6.     Ölkənin özünü təmin edə bilən səviyyəyə gətirilməsi, kəndli təsərrüfatına dövlət güzəşti edərək modern kənd təsərrüfatı və heyvandarlığın yaradılması.

7.     Sabit və az gəlirlilərin vəziyyətinin yaxşılaşdırılması, şəhid ailələrinin və əlillərin maddi və mənəvi vəziyyətinin yaxşılaşdırılması.

8.     Qaçqınların tez vaxtda öz torpaqlarına qaytarılması üçün görülən işlərin gücləndirilməsi ilə yanaşı, onların sosial və iqtisadi vəziyyətinin yaxşılaşdırılması. İşğaldan azad ediləcək torpaqların iqtisadi və sosial bərpası.

9.     Azərbaycanı müasir inkişaf etmiş ölkələr səviyyəsinə gətirmək üçün iqtisadiyyatda beynəlmiləl inteqrasiyaya nail olub ictimai inkişafın milli əsaslar üzərində qurulması.

10.  Milli ordunun, təhlükəsizlik orqanlarının və polisin işinə milli qayğı göstərilməsi, bu təşkilatların üzərinə düşən vəzifələri yerinə yetirmələri üçün lazım olan şəraitin yaradılması.

11.   Ermənistanın silahlı təcavüzü nəticəsində işğal edilən torpaqların azad edilməsi, Qarabağ probleminin Azərbaycanın ərazi bütövlüyü və dövlət suverenliyi prinsiplərinə uyğun olaraq həll edilməsi. Bu problem Azərbaycanın milli mənafeyinə uyğun həll edilmədiyi halda Milli Konqres Partiyası Qarabağ uğrunda mübarizəsini davam etdirəcək.

12.   Güney Azərbaycan türklərinin millətlərin öz müqəddəratını təyinetmə haqqı əsasında müstəqil dövlət qurmaq hüququnun tanınması, Qərbi Azərbaycan torpaqlarının və Dərbəndin qaytarılması, Azərbaycanın siyasi, iqtisadi və hüquqi bütövləşməsi.

13.   Azad Qafqaz evinin yaradılması, Qafqaz xalqlarının dostluq və sıx əməkdaşlıq şəraitində inkişafının təmin edilməsi.

14.   Azərbaycanın Gürcüstanla strateji əməkdaşlığı çərçivəsində Borçalı azərbaycanlıları ilə mədəni, iqtisadi və başqa əlaqələrin gücləndirilməsi.

15.   Dünya azərbaycanlıları ilə sıx əlaqələr yaradıb Azərbaycanın tarixinin və mədəniyyətinin tanınması üçün beynəlxalq səviyyələrdə iş birliyinin və əməkdaşlığın yaradılması.

             Siyasi təşkilat olan Milli Konqres Partiyası öz məqsədlərini həyata keçirmək üçün Azərbaycan Respublikası Konstitusiyası, “Siyasi partiyalar haqqında” Qanun və başqa qanunların müəyyən etdiyi qaydalara uyğun siyasi fəaliyyət göstərir, Azərbaycana, xalqımıza, hər bir vətəndaşa xidmət etməyi özünün əsas vəzifəsi sayır, hakimiyyəti partiyanın məqsədlərinin həyata keçirilməsinin vasitələrindən biri hesab edir.

Yaşasın Azərbaycan!

Var olsun millətimiz!

Azərbaycan xalqına eşq olsun!

          

​"BAŞ NAZİR VƏZİFƏSİ MƏNƏ TƏKLİF OLUNDU, QƏBUL ETMƏDİM"

İxtiyar Şirin: “Prezident Administrasiyasından dəvət gəlsə, dialoqda iştirak edəcəm”

“Müsavat və AXCP-yə məsləhət görərdim ki...”

“Əbülfəz Elçibəy, İsa bəy, Pənah bəy gecə saat 12 idi, məni zəng edib çağırdılar. Əbülfəz bəy dedi ki, qərara almışıq ki, Baş nazir vəzifəsini sənə təklif edək...”

Avqustin 1-də Klassik Xalq Cəbhəsi partiyası (KXCP) özünün III Qurultayını keçirdi. Səttar Bəhlulzadə adına Mədəniyyət Sarayında baş tutan qurultayda bir çox tanınmış ictimai-siyasi xadimlər, deputatlar, media təmsilçiləri və s. iştirak ediblər. Bəzi mətbu orqanlar yazır ki, keçmiş Baş prokuror, Milli Konqres Partiyasının sədri ixtiyar Şirinin qurultaydakı çıxışı cəbhəçilər tərəfindən etirazla qarşılanıb. Belə ki, Baş prokuror olduğu dönəmdə prezident Əbülfəz Elçibəyin həbsinə sanksiya verdiyi iddia olunan İxtiyar Şirin səhnəyə çıxan zaman, yerdən etiraz əlaməti olaraq “Ən böyük Elçibəy!” şüarları səslənib və hətta fit çalanlar da olub.
Odur ki, İxtiyar bəylə müsahibəmizdə ilk olaraq KXCP-nin qurultayına kim tərəfindən çağırıldığını və ona qarşı etirazların nə dərəcədə əsaslı olduğunu aydınlaşdırmağa çalışdıq:
- Mirmahmud bəy mənə telefonla zəng etdi, xahiş elədi ki, KXCP-nin qurultayında iştirak edim. Mən də ona iştirak edəcəyim barədə məlumat verib, təyin olunan gündə qurultayda iştirak etmişəm.

-Bəzi mətbu orqanlarda qurultayda çıxış edən zaman Sizə qarşı şüarlar səsləndirildiyi bildirilir...

-Köhnə cəbhəçilərlə mənim münasibətim çox yüksək səviyyədədir. Xüsusilə, KXCP-nin üzvləri ilə mənim çox gözəl münasibətim var və bu qurultayda da oraya gedərkən məni çox gözəl qarşıladılar. Qurultayda da ikinci olaraq mənə söz verdilər. Mən qonaq kimi durub çıxış elədim və KXCP üzvlərinin, köhnə cəbhəçilərin Azərbaycanın müstəqillik qazanmasında, azadlıq əldə etməsində, suverenliyinin möhkəmləndirilməsində rolundan danışdım. Bu, yəni onlar haqqında dediyim sözlər də qurultay iştirakçıları tərəfindən çox yaxşı qarşılandı. Onlar məni alqışladılar və təbii ki, “Elçibəy!” deyə şüarlar da səsləndirdilər. Mən də onlara qoşularaq “Var olsun Elçibəy!” sözünü işlətmişəm. Hesab edirəm ki, onların mənə münasibətində və mənim ordakı iştirakımda o qəzetdə yazılan heç bir hadisə baş verməyib.


“ELÇİBƏYİN HƏBSİLƏ BAĞLI SAXTA SANKSİYANI ƏLİ ÖMƏROVLA NEMƏT PƏNAHOV TƏRTİB ETMİŞDİ”


-Amma bəzi elçibəyçilər, köhnə cəbhəçilər arasında hələ də belə bir fikir var ki, siz Baş prokuror olaraq prezident Əbülfəz Elçibəyin həbsinə sanksiya vermisiniz...

- Bu məsələ yekunlaşıb. Bununla bağlı mən Əli Ömərovu məhkəməyə verdim. Həmin məhkəmə qətnaməsini də sizə verərəm, əgər istəsəniz. Və həmin məhkəmədə Əli Ömərov mənim belə bir sanksiya verdiyim barədə dediklərini sübut edə bilmədi. Çünki həqiqətən də belə bir sanksiya yoxdur. Buna görə də məhkəmə Əli Ömərovun dediklərini yalan, doğru olmayan məlumat hesab etdi və ona 500 manat da cərimə cəzası verdi. Yəni bu məsələ məhkəmə vasitəsilə yükunlaşıb. Ona görə də mənə qarşı deyilən bu haqsız iradlara cavab verməkdən yorulmuşam. Bununla bağlı məhkəmənin qətnaməsi var ki, Elçibəyin həbsinə İxtiyar Şirinov heç bir sanksiya verməyib.

-O halda bu informasiya hardan qaynaqlanmışdı, bunun yayılmasına səbəb nə idi?

-Bu informasiya 1993-cü il 4 iyun Gəncə çevrilişindən sonra Əli Ömərovun və çevrilişdə işitrak edən digər şəxslərin hakimiyyətdə olanları, xüsusilə də məni ləkələmək üçün irəliyə atdıqları bir böhtan, yalan idi. Adamları da buna inandırmaq üçün özlərinin tərtib etdikləri saxta sanksiyanı camaata göstərirdilər ki, İxtiyar Şirin Əbülfəz Elçibəyin həbsinə sanksiya verib.

-Həmin saxta sənədi Əli Ömərov tərtib etmişdi?

- Bəli, Əli Ömərov Nemət Pənahovla birlikdə tərtib etmişdi. Bunu Nemət Pənahov etiraf etdi. “Azadlıq” qəzetində, “Yeni Müsavat” qəzetində onun müsahibələri getdi ki, bəli, həmin sanksiyanı mən, Əli Ömərov, Surət Hüseynov və digərləri bir yerdə tərtib etdik...

- Sizcə, həmin vaxt bu məsələnin arxasında daha ciddi fiqur dayanmırdı? Məsələn, Heydər Əliyevin burda rolu, göstərişi olmuşdu?

- Mən deyə bilmərəm. O barədə mənim heç bir məlumatım yoxdur.


“SURƏT HÜSEYNOVLA ETİBAR MƏMMƏDOV ARASINDA HANSISA İŞBİRLİYİ VAR İDİ"


-1993-cü il qiyamından söhbət düşmüşkən, səhv etmirəmsə, bu qiyamla bağlı müsahibələrinizin birində Etibar Məmmədovu da ittiham etmişdiniz...

- Etibar bəy həmin qiyamda iştirak etdiyini inkar etmir ki. Özü indi də təsdiq edir. Ancaq bunu onunla əsaslandırır ki, guya xalqın xeyrinə olan hərakat olub, ona görə onu dəstəkləyib. Yəni Etibar Məmmədov özü həmin qiyamda iştirakını heç vaxt inkar etməyib.

- Belə aydın olur ki, həmin dönəmdə Etibar Məmmədovla Surət Hüseynovun münasibəti olub...

- Vallah, mən sizə bir şey deyim də... Bu münasibətələr yəqin ki, olub. Çünki bizim hakimiyyətimiz dövründə - 1992-ci ilin sonunda Surət Hüseynov, Etibar Məmmədov, Rəhim Qazıyev və bir neçə başqa hakimiyyətdə olan şəxslər görüşüb, bir yerdə müzakirə keçiriblər. Orda Pənah Hüseynov, İsa Qəmbər və bir neçə başqa şəxs olub. Həmin vaxt Surət Hüseynov belə bir təklif irəli sürüb ki, Etibar Məmmədov baş nazir gətirilsin. Bu təklifin özü göstərir ki, onlar arasında müəyyən münsibət, müəyyən bir müzakirə olub ki, bu təkliflə hakimiyyətdə olanların yanına gəliblər.

- Cavab nə olub?

- Sonradan bu təklif hakimiyyət dairələrində mənsiz müzakirə olunub, təbii ki, qəbul olunmayıb. Bu məsələ, bu söz-söhbətin özü də hakimiyyətdə müəyyən yer tutmaq üçün Surət Hüseynovla Etibar Məmmədov arasında hansısa bir işbirliyini göstərən faktlardan biridir. Mən bu cür düşünürəm.

- Maraqlıdır, həmin dönəmdə aparılan gizli müzakirələrdə Baş prokuror olaraq siz niyə iştirak etməmisiniz?

- Mən o məsələlərə qarışmırdım. Siyasi hakimiyyətin, müəyyən yüksək vəzifələrin bölüşdürülməsi ilə bağlı məsələlərdə mən iştirak etmirdim. Baxmayaraq ki, mən Baş prokuror işləyərkən Azərbaycan Respublikasının Baş naziri olmaq vəzifəsi mənə təklif olundu, mən onu qəbul etmədim.

- Kim tərəfindən təklif olundu?

- Əbülfəz Elçibəy tərəfindən. İsa bəy, Pənah bəy də oturmuşdular, gecə saat 12 idi, məni zəng edib çağırdılar. Əbülfəz bəy dedi ki, qərara almışıq ki, Baş nazir vəzifəsini sənə təklif edək. Mən qəbul etmədim.

- Nə üçün?

- Ona görə qəbul etmədim ki, mən təzə baş prokuror getmişdim, orda görülməli işlər çox idi, onu yarımçıq qoyub başqa bir işə getmək Azərbaycan dövləti üçün lazımsız bir şey idi.

- Həmin vaxt Pənah bəy baş nazir deyildi?

- Xeyir. Pənah bəy ondan sonra baş nazir oldu. Və hakimiyyətin sonuna qədər də işlədi.

- Bəlkə də bu sualı mətbuatda dəfələrlə cavablandırmısınız. Amma bu gün üçün hələ də qaranlıqdır ki, Elçibəy nə üçün hakimiyyəti tərk etdi, bunun başqa alternativi yox idimi?

- Mən hesab edirəm ki, bunun başqa heç bir alternativi yox idi. İndi deyirlər ki, hakimiyyət kreslosunu, vəzifəsini qoydu getdi. Amma Əbülfəz Elçibəy burda qalsaydı, ola bilsin ki, onu öz kabinetindən, öz iqamətgahından qovmaq üçün daha dəhşətli hadisələr baş verə bilərdi. Rəhmətlik Elçibəy bunların hamısını əvvəlcədən gördü və doğru da qərar qəbul etdi.

- Hesab edirsiniz ki, bu məsələdə Elçibəy komandasındakı vəzifəsinə, millətinə dönük insanların varlığı da ciddi rol oynadı?

- Rəhmətlik Elçibəy yəqin götür-qoy edib, görüb ki, üsyançılara qarşı qoya biləcək ciddi bir qüvvə yoxdur. Dönüklər çox oldu. Həmin dövrdə mən Gəncədə girov saxlanılırdım, adını həbs qoymuşdular, burda gedən proseslərin içində deyildim. Sonradan əldə etdiyim məlumatlardan belə çıxır ki, öz imkanları yox idi, vəzifəsini qoyub gedənlər də olub, dönüklər də çıxıb, Əbülfəz Elçibəyin kadrlarından yeni gələn hakimiyyətlə işbirliyinə gedənlər olub və s. Ona görə də, hesab edirəm ki, Əbülfəz bəy doğru qərar qəbul edib. Azərbaycanı çox ciddi bir fəlakətin içinə sürükləməmək üçün Bakını tərk edib, Naxçıvana gedib.

- Həmin dönəmdə Sizin vəzifədən alınmanız, həbsiniz nə dərəcədə qanuni idi? Səhv etmirəmsə, bununla bağlı məhkəməyə də müraciət etmişdiniz...

- Bilirsiniz, vəzifədən getmək məsələsi siyasi məsələdir. Əsası olsa da, olmasa da... Onsuz da hakimiyyət dəyişir, bunun üçün də digər vəzifəli şəxslərin dəyişilməsi labüd idi, baxmayaraq ki, hüquqi cəhətdən doğru deyildi. Çünki baş prokur 5 illiyinə təyin olunur və o, 5 il müddətində öz vəzifəsini yerinə yetirməlidir. Amma 5 il müddətdən qabaq məni vəzifədən götürmək üçün guya Gəncədə qan tökmüşük, Surət Hüseynova guya qanunsuz sanksiya verilib və s. bu cür iddialar irəli sürdülər və o konteksdə məni vəzifədən kənarlaşdırdılar. Bu günə kimi də mənim haqqımda cinayət işi gedir, artıq 22 ildir. Amma o cinayət işini nə məhkəməyə verən var, nə də başqa bir nəticəsi yoxdur.

- Sizə qarşı bu ittihamların irəli sürülməsində konkret kimin rolu oldu? Burada kim maraqlı idi?

- O hakimiyyətin devrilməsində maraqlı olanların hamısı. Çünki mən dövlət çevrilişinə qarşı çıxmışdım. Onlar hesab edirdilər ki, dövlət çevrilişinə qarşı çıxanların hamısı ya məhv olunmalıdır, ya sıradan çıxarılmalıdır, başqa yolu yoxdur.

- Səhv etmirəmsə, 2010-cu ildə öz hüquqlarınızı müdafiə etmək üçün məhkməyə müraciət etmişdiniz... 

- Bəli. O əmək hüququ ilə bağlı idi, Baş prokuror vəzifəsi ilə bağlı deyildi. Yəni məni prokurorluq işçisi kimi qanunsuz olaraq işdən çıxarmışdılar. Lakin məhkəmələr bundan imtina etdilər.

- Siz təkrar vəzifəyə qayıtmaq istəyirdiniz?

- Qayıtmaq istəmirdim. Söhbət mənim ora qayıtmağımdan getmir. Mənim nə işim var orda? Sadəcə olaraq mən baş vermiş qanunsuz qərarın ləğv olunmasını tələb edirdim, amma məhkəmələr buna baxmaqdan imtina etdilər.

- Nəyi əsas gətirdilər?

- Onu əsas gətirdilər ki, guya məhkəməyə vaxtında müraciət olunmayıb. Amma mən vaxtında müraciət etmişdim. Yəni mənə əmr nə vaxt təqdim olunmuşdusa... Çünki məni əmrlə tanış etməmişdilər. Qanuna görə, hər hansı bir işçi işdən çıxarılarkən, o, əmrlə tanış olmalıdır. Ondan sonra onun 1 ay müddətində şikayət etmək hüquq var. 1993-cü ildən 2009-cu ilə kimi bu əmrlə məni tanış etməmişdilər. Mən çox çətinliklə 2009-cu ildə o əmri ala bildim və ondan sonra mənim şikayət hüququm yarandı. Aldım ki, görüm məni nə adla çıxarırlar. Baxdım gördüm ki, ad da qoymayıblar. Heç bir şey qoya bilməyiblər, elə-belə işdən çıxarıblar, “Ali Sovetin filan qərarına əsasən işdən çıxarılsın”. Amma buna baxmaqdan imtina etdilər ki, guya, vaxtında məhkəməyə müraciət etməmişəm.

- İşə baxılmamasının əsas səbəbi nə idi?

- İşə baxmamağın əsas səbəbi o idi ki, məhkəmədə onlar mənim işdən çıxarılmağımın səbəbini əsaslandıra bilməyəcəkdilər. Heç bir əsasları yox idi. Yəni o qanunsuz qərarı əsaslandırmaq üçün əllərində bir arqument olmadığına görə də baxmaqdan imtina etdilər. Məsələ bu yerdədir. Ali Məhkəməyə kimi getdim, hamısı eyni fikirdə qaldılar ki, baxmaq olmaz, təhlükəlidir.

- Adətən hakimiyyət rəsmiləri kadr çatışmazlığından şikayətlənirlər. O halda Sizin kimi kadrın imkanlarından nə üçün yararlanmaq istəmirlər?

- Belə bir şey hal-hazırda müzakirə də olunmur. Nə hakimiyyət deməyib ki, İxtiyar Şirin kimi kadra ehtiyacımız var, nə də mən belə bir məsələni gündəliyə gətirməmişəm. İndi çalışırıq ki, daha çox siyasətlə məşğul ola bilək və öz imkanlarımızı, potensialımızı bu istiqamətə yönəldək. Onun üçün də görək şərait olacaqmı? Amma konkret dövlət məmuru işləmək mənim də məqsədim deyil.

- Siyasi fəaliyyətinizlə bağlı nə kimi yenilik var? 

- Milli Konqres Partiyasının fəaliyyətini gücləndirmək istəyirik. Qurultaya da hazırlaşırıq. Çalışırıq ki, qurultayımızı keçirib, partiyamızın qarşısında duran vəzifələri bir-bir dəqiqləşdirək və işlərimizi gücləndirək.

- Milli Konqres müxalif partiya kimi fəaliyyət göstərir?

- Təbii ki, müxalif partiyadır. Azərbaycanda bir hakimiyyət partiyası var, qalan partiyalar əslində müxalifət partiyası olmalıdır.

- Azərbaycanda illərdir oturuşmuş müxalifət var, lakin xalqın bu qüvvəyə inamı yoxdur. Siz belə bir vəziyyətdə prosesdən çıxış yolunu necə görürsünüz?

- Prosesdən çıxş yolunu bu gün söyləmək çox çətindir. Çünki vəziyyət doğrudan da mürəkkəbdir. Amma mən hesab edirəm ki, heç olmasa müxalifətdə olan siyasi partiylar öz aralarında müəyyən bir dialoqmu deyək, əməkdaşlıqmı, fəaliyyət birliyimi deyək, nə isə bir işbirliyi qurmağa çalışmalıdırlar. Özü də bu işbirliyi, əməkdaşlıq elə hakimiyyətə qarşı qurulan işbirliyi, əməkdaşlıq kimi olmamalıdır. Bu işbirliyi, bu əməkdaşlıq Azərbaycanın siyasi, iqtisadi, sosial, mədəni və s. bütün sahələri ilə bağlı siyasi partiyaların ayrılıqda, birgə görməli olduqları işlər nədən ibarətdir, o sahələrlə bağlı olmalıdır. Bu işləri, problemləri müzakirə etməlidirlər, həlli yollarını axtarıb tapmağa çalışmalıdırlar. Yəni ən azı cəmiyyətə bu məsələlərlə bağlı müəyyn fikirlərin, ideyaların olduğunu, partiyaların bu barədə siyasətinin olduğunu çatdırmağa çalışmalıdırlar. Cəmiyyətin içərisində özlərini yaşatmaq üçün partiyalar bu fəaliyyətlə məşğul olmalıdırlar. Və hakimiyyətə də təklif etmək lazımdır ki, bu işi bu cür görsən daha yaxşı olar, hakimiyyətin nöqsanları budur, səhv gördüyü işlər bunlardan ibarətdir və bu səhvləri, bu yanlışları düzəltmək üçün hansı işləri görmək lazımdır. Qarşıdan parlament seçkilər gəlir. Azərbaycanın siyasi həyatında ən vacib məsələlərədn biri parlament seçkiləridir. Siyasi partiyalar seçki ilə bağlı ən azı bir yerə toplaşıb, hansısa müzakirələr aparmalıdırlar. Amma çox təəssüf ki, bunu etmək mümkün olmur.

- Sizcə, buna səbəb nədir?

- Mən səbəbini dəqiq deyə bilmərəm. Amma hər halda bu lazım olan bir məsələdir. Səbəbini dəqiq deyə bilmərəm, çünki bilmirəm bu məsələlər nədən qaynaqlanır...

- Siz müxalifətin birliyi ilə bağlı hansısa təşəbbüs etmisiz?

- Yox, təşəbbüs etməmişəm. Ancaq vəziyyət elədir ki, partiyaların bu gün bu vəziyyətlə bağlı birgə hansısa müzakirə aparmasının mümkünlüyü də yoxdur, sıfır dərəcəsindədir. Çünki mövqelər, münasibətlər çox fərqlidir. Halbuki mövqe və münasibət bir olmalıdır – Azərbaycanda demokratik seçkilərin keçirilməsi. Hamı buna çalışmalıdır. Bununla bağlı müzakirələr getməlidir. Amma bugünkü gün bəzi partiyalar digər partiyalardan şübhələnir, başqaları başqa cür mansibət bildirirlər, kimi deyir kimlərsə hakimiyyətlə dialoqa gedib nəyisə qazanmaq istəyir və s. Yəni belə-belə söhbətlər gəzdiyinə görə, bu partiyaların bir yerə yığılıb, hansısa bir məsələni müzakirə etməsi çox çətin, müşkül bir işə dönüb.

- Yeri gəlmişkən, dialoq məsləsinə Sizin münasibətiniz necədir?

- Mən normal baxıram buna. Amma çalışmaq lazım idi ki, bu dialoqda Azərbaycanda qeydiyyatda olan bütün partiyalar iştirak etsin. Bir hissəsini dialoqa çağırıb, digər hissəni dəvət erməmək, hesab edirəm ki, elə görülən işin özünə müəyyən şübhə yaradır. Ki, bu niyə belədir, bir hissəsi orda oturub, bir hissəsi yoxdur. Amma 40-50-yə qədər qeydiyyatda olan partiya var, onların fəaliyyətinin hansı səviyyədə olmasından asılı olamayaraq, hamısına dəvət göndərilməli idi. Çünki onların hamısının seçkidə iştirak etmək hüquqları var. Qeydiyyatdan keçmiş partiyaların hər birinin seçkidə iştirak etmək hüququ var. Onun imkanı nə qədərdir, qoyulmalıdır qırağa, o hakimiyyətlik iş deyil. Amma hüququ olan partiyaların hamısı ora dəvət olunmalı idi.

- Növbəti dəfə konkret olaraq Sizə dəvət gəlsə, iştirak edəcəksiniz?

- Əlbəttə iştirak edəcəm. Niyə iştirak etməyim?! Çünki biri var qıraqdan danışasan, biri də var gedib orda iştirak edib, problem haqqında öz fikrini deyəsən ki, bax budur. Qəbul etməsələq, sonra deyərsən ki, mən dedim, qəbul etmədilər. Amma qıraqda durub şikayət etməyin bu işə bir xeyri yoxdur. Əgər dəvət edəcəklərsə, hamı iştirak etməlidir, o cümlədən Müsavat Partiyası da, Xalq Cəbhəsi Partiyası da.  Mən məsləhət görərdim ki, iştirak etsinlər, sözlərini desinlər.


“PARLAMENT SEÇKİLƏRİNİN DEMOKRATİK KEÇİRİLƏCƏYİNƏ İNANMIRAM”


- Qeyd etdiyiniz kimi, qarşıdan parlament seçkiləri gəlir. Seçkilərə qatılmaq fikriniz varmı?

- Təbii ki, seçkilərə qatılmaq fikrimiz var. İndi neçə namizədlə, mən deyə bilmərəm. Seçkilərlə bağlı adamların gözü o qədər qorxub ki... Gedib seçkidə iştirak edib, sonra o qədər çətinliklər içərisində qalırlar ki... Əslində Azərbaycan kimi yeni yaranmış bir dövlətdə, seçkilərdə partiyaların, yaxud da müstəqil namizədlərin iştitrakı müəyyən formatda maliyyələşməlidir. Adamlar gedib son imkanlarını seçkiyə verir, lap səs qazansa da, o səsləri rəsmiləşdirə bilmirlər və seçkidən çox məyus halda çıxırlar. Və ikinci dəfə o seçkilərə heç qatılmaq da istəmirlər. Hamı bizim kimi deyil ki, 1 dəfə, 2 dəfə, 3 dəfə, qatılsın, yorulmasın. Adamlar yorulurlar. Ona görə də neçə namizədlə qatılacağımızı dəqiq bilmirəm, amma seçkilərdə iştirak etmək fikrimiz var. Əgər hesab etsək ki, doğrudan da bu seçkilər hakimiyyət tərəfindən normal, demokratik keçirilməyə çalışılacaq...

- İnanırsız buna?

- Mən inanmıram. İndi deyirsiz, dəvət olunsanız gedəcəksiniz, amma mən dəvət olunacağıma da inanmıram. Çünki orda artıq dairə müəyyənləşib ki, kimlər olacaq. Amma dəvət olunsam, gedəcəm. 

Daşqın Nuriyev, 
"Hürriyyət"
  

TÜRKİYƏ CÜMHURİYYƏTİNİN TƏCAVÜZKAR ERNƏNİSTANLA HAVA VƏ QURU SƏRHƏDLƏRİNİN 5 APREL 1993-CÜ İL TARİXDƏ BAĞLANMASINDA İXTİYAR ŞİRİNİN ROLU DANILMAZDIR

  Azərbaycanın sabiq Baş prokuroru İxtiyar Şirin Kəlbəcərin Ermənistan tərəfindən işğalından sonra Türkiyə Cümhuriyyətinin  Ermənistanla quru və hava sərhədlərinin bağlanmasının təşkilatçılarından biridir. O, 1993-cü ilin mart ayının sonları və aprelin ilk günlərində  Ermənistan və Rusiya silahlı qüvvələri tərəfindən Kəlbəcər işğal ediləndə Azərbaycan Silahlı Qüvvələrinin gücsüzlüyünün şahidi oldu. . Hələ Kəlbəcərin tam süqutu elan ediləndən bir-iki gün əvvəl İxtiyar Şirinə çox yaxın olan bir şəxs hansısa yollarla Rusiyadan gətirdiyi Rusiyanın Azərbaycanın indiki işğal edilən ərazilərimizdən daha geniş ərazinin erməni-rus silahlı qüvvələri tərəfindən işğal edilməsi barədə planları ilə və bunu təsvir edən xəritə ilə onu tanış etdi. Kəlbəcərdən gələn məğlubiyyət xəbərləri onu bu gördüklərinə inandırdı. O, Azərbaycan hakimiyyətinin və ordunun bu işin öhdəsindən təkbaşına gələ bilməyəciyini bildiyi üçün ona çox yaxın olan Türkiyə hökumətinə bağlı bir nəfəri dərhal bu sənədlərlə Ankaraya vəziyyət barədə məlumat verməyə göndərir.  Ankaradan vəziyyətin Süleyman Dəmirələ məruzə edildiyini və  İxtiyar Şirinin dərhal oraya getməyinin zəruri olduğunu bildirdilər. O, prezident Əbülfəz Elçibəyə bunlar barədə məlumat verib, Türkiyə ilə Azərbaycanın hazırkı vəziyyəti barədə danışıqlar olduğunu bildirir.  İxtiyar Şirin prezidentə ölkənin durumu barədə Baş Bakan Süleyman Dəmirələ məruzə olunduğunu, danışıqlar üçün onun Ankaraya dəvət edildiyini deyib.  Əbülfəz bəy onun adından danışmaq səlahiyyətini İxtiyar Şirinə verdikdən sonra Baş Prokuror dərhal Türkiyəyə gedib. Onun əvvəllər Süleyman Dəmirəllə şəxsi tanışlığı da yox idi. O, Türkiyəyə prezidentin adından gedirdi və orada deyiləcək sözlər də Azərbaycan dövlətinin adından deyiləcəkdi. İxtiyar Şirin aprelin 3-də Ankaraya getmiş və elə həmin gün də Süleyman Dəmirəllə görüşmüş, Azərbaycanın vəziyyəti, dövlətin, o cümlədən silahlı qüvvələrin nələrə ehtiyacı olduğunu, ona bildirmişdir. Söhbətdən dərhal sonra Azərbaycana yardımlarla bağlı ciddi işlər görülməyə başlanmışdır. İlkin olaraq Süleyman Dəmirəl 5 aprel 1993-cü il tarixdə bəyanatla çıxış edərək Ermənistanı  dərhal işğal etdiyi Azərbaycan torpaqlarından çəkilməsini tələb etdi, Türkiyənin Ermənistanla bütün quru və hava sərhədlərinin bağlandığını elan etdi. Quru və hava sərhəddinin bağlanmasının əsas səbəbi əsasən Türkiyənin hava və quru sərhədləri vasitəsi ilə Amerika Birləşmiş Ştatlarından, bir sıra Avropa və ərəb ölkələrindən Ermənistana  terrorçu qüvvələrin, silah və sursatın daşınmasının qarşısını almaq, həm də təcavüzkar dövlətin iqtisadi və siyasi blokadaya alınması idi. Bundan başqa Türkiyə Silahlı Qüvvələri Ermənistanla sərhəddə irimiqyaslı hərbi təlimlərə başladı. Bu da Türkiyə Silahlı Qüvvvələrinin Ermənistana "biz hər şeyə hazırıq" mesajı idi. İşğalın qarşısını almaq üçün Türkiyə və Azərbaycan arasında qurulacaq hərbi-siyasi münasibətlər barədə və ediləcək yardımlarla bağlı Türkiyə və Azərbaycan arasında sazişlər və protokollar imzalandı. Bir neçə gündən sonra Azərbaycana ordumuzun hərbi hazırlığını təşkil etmək üçün 175 yüksək hazırlıqlı türk zabiti göndərildi. Bu o dövr üçün, elə hazırkı dövr üçün də ordu hazırlığı üçün çox böyük qüvvə idi. Bundan əlavə xeyli hərbi və tibbi ləvazimatlar dalbadal təyyarələrlə Azərbaycana çatdırıldı. Bundan sonra Türkiyə diplomatiyası da  Ermənistanın təcavüzünə qarşı çox böyük həmlələr etməyə başladı. Məhz bu dəstəyin nəticəsi idi ki, aprelin 28-də BMT Təhlükəsizlik Şurasında Kəlbəcərin işğalıyla bağlı 822 saylı qətnamə qəbul olundu. Türk zabitləri də Azərbaycana gələn kimi dərhal hərbi çağırış həyata keçirildi və 15 min sağlam, hərbiyə yararlı gənc türk zabitlərinin sərəncamına verildi. Onlara çox güclü təlimlər keçitilməyə başlanıldı. Türkiyənin  qərarı belə idi ki, hər 3 aydan bir həmin türk zabitləri Azərbaycan ordusunun sərəncamına əlavə olaraq 15 min döyüşə tam hazır, hərbi təlimlərdə sınaqdan çıxmış döyüşçü verməliydi. İlkin olaraq 15 minlik döyüşə tam hazır qüvvələri oktyabr ayında Azərbaycan Silahlı qüvvələri təhvil alacaqdı. Yüksək standartlara cavab verən ordu hazırlanacaqdı. Bu ordu bir gündə 30-40 kilometr piyada, döyüşərək irəliləməyə qadir olan ildırımsürətli bir qüvvəyə çevriləcəkdi. Nəticədə Azərbaycan ordusu regionun bir nömrəli ordusu olacaqdı.

   Ermənistan və Rusiya da bizim hazırlıqlarımızdan təlaşa düşmüşdülər və 822 saylı qətnamədən sonra Ermənistan hökuməti  Kəlbəcərin sentyabrın əvvəllərində işğaldan azad ediləcəyinə razılıq verdilər. Ancaq Rusiyanın, Ermənistanın və onların Azərbaycandakı  agentlərinin birgə hazırlayıb həyata keçirdikləri 4 iyun Gəncə qiyamı bütün planları pozdu. Gəncə qiyamı Azərbaycanı demək olar ki, məhv etdi. Bu qiyamın ardından qısa müddətdə Azərbaycanda Rusiyanın və Ermənistanın planları gerçəkləşməyə başladı. Düşmən Ağdamı, Füzulini, Cəbrayılı, Zəngilanı və Qubadlını işğal etdi.
   Hazırda isə Türkiyənin Ermənistanla sərhədlərinin açılması qarşılığında Ermənistandan nə az, nə çox- işğal etdiyi Azərbaycan ərazilərinin azad edilməsi tələb olunur.

3. İXTİYAR ŞİRİNİN YÜKSƏK DÖVLƏT VƏZİFƏLƏRİNDƏ GÖRDÜYÜ İŞLƏR

                          
   
   Azərbaycanda müstəqillik tərəfdarları ilə müstəqilliyiın əleyhinə olan qüvvələrin arasında gedən siyasi mübarizənin nəticəsində 1991-ci ilin noyabr ayında Azərbaycan Respublikası Ali Sovetinin səlahiyyətləri 50 xalq deputatından (25 hakimiyyət +25 müxalifət) ibarət Milli Şuraya verildi. Hakimiyyəti təmsil edən deputatların heç biri vəzifəsindən istefa verib Milli Şuraya gəlmədiyi halda, Azərbaycan Respublikasının Xalq derutatı olan İxtiyar Şirin Beyləqan rayon prokuroru vəzifəsindən istefa verib Milli Suranın üzvü, hüquq siyasəti komissiyasının sədri seçildi. Ali qanunverici orqanın komissiya sədri kimi İxtiyar Şirin Azərbaycanın dövlət müstəqilliyini və suverenliyini möhkəmləndirən, dövlət quruculuğu məsələlərini həll edən, dövlət orqanlarının hakimiyyətdəki yerini müəyyən edən bir çox qanunların hazırlanmasına başçılıq etdi. Onun hazırlayıb təqdim etdiyi qanuıı layihəsinin Azərbaycan Respublikası Ali Sovetində müzakirə edilərək qəbul edilməsi nəticəsində Azərbaycanın ali qanunverici orqanının 1918-ci ildə müəyyən edilən tarixi adı bərpa edildi. Azərbaycan Respublikası Ali Sovetinin Milli Şurası adı Azərbaycan Respublikası Milli Məclisi adı ilə əvəz olundu.
   Azərbaycanın istiqlalı və milli dövlət quruculuğu uğrunda mübarizə aparan İxtiyar Şirin Müsavat Partiyasının Azərbaycan Respublikasında bərpa edilməsi üçün yaradılan bərpa qrupunun 20 nəfər üzvündən biri seçildi. Milli Şurada dövlət quruculuğu və hüquq siyasəti ilə bağlı bir sıra işlərin görülməsinə və qanunların hazırlanmasına nail olan İxtiyar Şirin 1992-ci il may ayının 18-də hakimiyyətə gələn Azərbaycan Xalq Cəbhəsinin rəhbərliyinin təklifini qəbul etdi və o, 20 may 1992-ci il tarixdə Azərbaycan Respublikasının hüquq siyasəti üzrə dövlət müşaviri təyin edildi.
  Onun rəhbərliyi ilə qısa müddət ərzində dövlət quruculuğu, məhkəmə islahatlarının aparılması və cinayətkarlıqla mübarizə işlərinin təşkili üçün dövlət siyasətini müəyyən edən konsepsiyalar hazırlandı, Azərbaycan Respublikasının yeni konstitusiyasının layihəsi hazırlanmağa başlandı. Dövlət müşaviri İxtiyar Şirinin təklifi ilə dövlət sərhəddinin müəyyən edilməsi üçün Baş nazirin sədrliyi ilə dövlət komissiyası işə başladı, respublikanın sərhəd qoşunlarının yaradılmasına və dövlət sərhəddinin Rusiya sərhəd qoşunlarından təhvil alınmasına başlandı. Onun başçılıq etdiyi dövlət müşavirliyinin gördüyü işlərin nəticəsində respublikanın gömrük orqanları, respublika prezidenti yanında xüsusi idarə, prezident qvardiyası yaradıldı və fəaliyyətə başladı. Hərbi tribunal, hərbi prokurorluq, arbitraj məhkəməsi təşkil edildi, milli təhlükəsizlik orqanlarının strukturu və fəaliyyəti təkmilləşdirildi.
   İxtiyar Şirin Azərbaycan Xalq Cəbhəsi hakimiyyətinin davamlı təkidlərindən sonra Azərbaycan Respublikasının Baş Prokuroru olmağa razılıq verdi və o, 14 oktyabr 1992-ci il tarixdə Azərbayca Respublikasının Prezidenti Əbülfəz Elçibəyin təqdimatı ilə Azərbaycan Respublıkası Milli Məclisi tərəfindən bu vəzifəyə təyin edildi.
   Baş prokuror İxtiyar Şirin dərhal prokurorluqda struktur dəyişiklikləri etdi, prokurorluğun ştat sayını 300 nəfər artırdı, pensiyaya göndərilmiş təcrübəli işçilərin müəyyən hisəsəsini prokurorluğa qaytardı. Rusiyada, keçmiş ittifaqın digər respublikalarında prokurorluqda çalışan və müstəqillik qazanmış vətənə dönmək istəyən onlarla azərbaycanlını prokurorluğa işə qəbul etdi, attestasiya komissiyasının keçirdiyi sınaq imtahanlarından uğurla keçən yüzlərlə gənc hüquqşünasları prokurorluğa işə qəbul etdi. O, bacarıqlı, bilikli və vicdanlı prokurorluq işçilərini Baş prokurorluqda mühüm vəzifələrə, şəhər və rayon prokurorları, prokurur müavinləri vəzifələrinə təyin etdi. Baş prokurorun təklifi ilə prokurorluq işçilərinin əmək haqlarının  artırılması, döyüş bılgələrinin prokurorluq işçilərinin əmək haqlarının iki dəfə artırılması, onların iş və sosial şəraitinin yaxşılaşdırılması ilə bağlı Respublika Prezidenti Əbülfəz Elçibəy və Azərbaycan Respublikası Milli Məclisi qərarlar qəbul etdi.
  Görülən tədbirlər nəticəsində prokurorluqda əmək intizamı möhkəmləndirildi, işlərin keyfiyyəti və operativliyi artırıldı. Fəaliyyət qabiliyyəti və məsuliyyəti artırılan prokurorluğun fəaliyyəti göcləndi, prokurorluq Azərbaycan Respublikasının Konstitusiyası və qanunları ilə müəyyən edilən vəzifələrini uğurla yerinə  yetirməyə başladı.
  Azərbaycan Respublikasının Baş Prokuroru İxtiyar Şirin prokurorluğun bütün sahələrində ciddi dönüş yarada bildi.
   Vətəndaşların ərizə və şikayətlərinə baxılmasına Baş prokuror özü rəhbərlik etməyə başladı. Baş prokurorluğa daxil olan yüzlərlə ərizə və şikayətləri İxtiyar Şirin özü oxuyub hər birini nəzarətə götürür, bütün ərizələrə baxılmasının nəticələri onun özünə məruzə edilirdi. Bütün ərizələrə obyektiv və vaxtında baxılması üçün Baş prokurorluğun aparatı bütünlüklə səfərbər edilmişdi. İxtiyar Şirinin Baş prokuror təyin edildiyi ilk günlərdə Baş prokurorluğa hər gün yüzlərlə ərizə və şikayətlər daxil olurdusa və onların da böyük bir hissəsi təkrar ərizələr idisə, görülən işlərin nəticəsində təxminən 3-4 aydan sonra  Baş prokurorluğa hər gün artıq bir neçə ərizə və şikayət daxil olurdu. Baş prokuror onun qəbuluna gələn şəxsləri hər gün və dərhal qəbul edir, onların şikayət və müraciətlərinə qısa zaman ərzində baxılmasını təşkil edirdi. Bıınun nəticəsində Baş prokurorun qəbuluna gələn şikayətçilərin sayı da bir neçə dəfə azaldı.
  Vətəndaşların ərizə və şikayətlərinə vaxtında və qanunlara uyğun baxılması nəyicəsində onlarla qəsdən adam öldürmə və başqa ağır cinayətlərin üstü açıldı, cinayət etmiş şəxslər məsuliyyətə cəlb edildilər, yüzlərlə vətəndaşın pozulmuş hüquqları bərpa edildi.
   Baş prokurorun gördüyü tədbirlər nəticəsində  bütün respublikada aylarla və illərlə süründürülmüş yüzlərlə cinayət işlərinin ibtidai istintaqı qısa zaman ərzində tamamlandı və bu işlər üzrə qanuni qərarların qəbul edilməsi təmin edildi.
Qəsdən adam öldürmə haqqında olan, о cümlədən siyasi motivlərlə baş verməsi şübhə edilən qəsdən adam öldürmə cinayətlərinin istintaqı xüsusi nəzarətə götürüldü. Bunun nəticəsində bu işlərin istintaqı fəallaşdı, bir sıra işlər üzrə cinayət etmiş şəxslər müəyyən edilib məsuliyyətə cəlb edildilər.
   20 yanvar hadisələri, Xocalı soyqırımı, Şuşa və Laçının işğal edilməsi faktları üzrə olan cinayət işlərinin istintaqı İxtiyar Şirin Baş prokuror təyin edildikdən dərhal sonra onun bilavasitə rəhbərliyi ilə yenidən təşkil edildi, bir neçə ay ərzində minlərlə istintaq hərəkətləri yerinə yetirildi, bu cinayətləri etmiş şəxslər məsuliyyətə cəlb edilmyə başlandı.
Prokurorluğun fəaliyyətində edilən müsbət dəyişikliklər nəticəsində bu təşkilata ölkə vətəndaşlarının inamı artmağa başladı.

Ardı var...